Alimango

Mahigit isang taon na akong naninirahan dito sa Yorke Peninsula (map by http://www.yorkepeninsula.com/) pero noong Sabado ko lang nasubukan ang isa sa mga kinahihiligang gawin ng mga Australiano kapag mga huling araw na ng linggo. Karamihan sa mga malls dito ay sarado tuwing Linggo, dahil mas pinipiling puntahan ng mga taga-rito ang dagat, gulpo, o baybaying dagat para mangisda, manghuli ng mga alimango at mag-camping.

Kahit nga noong nasa Queensland pa ako, na humigit-kumulang 230 km. ang layo namin mula sa dagat, sinasadya pa rin ng mga taga-roon ang malayong baybayin gamit ang kanilang mga sasakyang hila-hila naman ang kanilang pinakamamahal na mga bangka.

Fishing boat; approximately Au$ 45,000

Ngunit dahil hindi pa namin kayang bumili ng bangka, nagpasya ang pangkat na sa Wallaroo jetty na lang magpalipas-oras habang namimingwit at nanghuhuli ng alimago. Galing Port Wakefield kung saan naroon ang manukan at ang Aking Tahanan, ang Wallaroo ay mga 30 minutong pagmamaneho rin sa bilis na 85 km./hr.

Wallaro jetty; Wallaro, South Australia

Ang mga dayuhang mangingisda.

A sand crab in the crab net (Au$ 15).

Ang pamimingwit at panghuhuli ng blue at sand crabs ay katulad din pala ng pakikipagsapalaran tungo sa katuparan ng ating mga minimithing pangarap sa buhay! Bukod sa dapat ay nasa tamang lugar at pagkakataon, kailangan din ang tiyaga, pinaglalaanan ng sapat oras, at mas nakabubuting maayos din ang samahan nang sa gayo'y may tuwa at galak habang nagtutulung-tulong sa panghuhuli ang mga pinakaaasam na mga isda't alimango.

Ngunit hindi basta may huli ay pwede na. Ang mga sand crabs (Ovalipes australiensis) dapat ay may habang 10 cm. para ito'y maiuwi; at ang mga blue crabs (Portunus pelagicus) naman ay dapat may sukat na 11 cm. Kapag maliit kaysa sa legal na sukat, kinakailangan itong itapon pabalik sa tubig kasama ang mga babaeng alimangong nakikitang may mga nabubuong itlog na sa kanyang tiyan.

photo from http://www.pir.sa.gov.au/

May mga mabibiling panukat, at ang sinusukat ay buong haba ng carapace mula sa kung saan sumusulpot ang pinakamahaba at kabilaang crab spines.


Dumating kami sa Wallaro jetty ng alas dose ng tanghali, at nagpasyang umuwi ng mga alas sais ng gabi. Sa anim na oras na aming pamamalagi roon, may nahuli naman kaming isang pulang isdang may lapad na dalawang pulgada at habang anim na pulgada; di namin alam ang pangalan o kaya'y nakunan ng litrato ang isdang 'yon pero mukha itong dalagang-bukid. Medyo minalas kami sa pangingisda pero sa isang dosenang alimango naman ang aming naiuwi noong gabing 'yon.

Isang napakasarap na hapunan! At siyempre hindi mawawala ang pinakapaborito kong ulam. Kahit na may isda't alimango na, mayroon pa ring katakam-takam na litsong manok sa aming hapag.


Nakakatuwa talagang lasapin ang sarap ng bunga ng aming pinagpaguran! Kung tutuusin nga, mas mahal pa siguro ang ibinayad namin sa gasolina (dahil apat ang sasakyang aming dala- sa Wallaroo nalang kasi kami nagkita-kita kaya hindi kami nakasakay sa iisang sasakyan lang) pero ang saya, galak at siglang naidulot nito sa amin habang sama-samang sinubukan ang hilig ng mga Australiano ay hindi naman mapantayan ng kung ano mang bagay.

Matapos naming kumain, napag-usapang dapat ay muling maulit ang pamamasyal at gawaing 'yon.

Protein Content

Chicken (leg, roasted) 3 oz. - 13.49 grams
Crab (blue, moist heat) 3 oz. - 17.17 grams

-http://www.annecollins.com/