Panauhing Pandangal (a prelude...)

PAUNAWA: Ang tagpo at mga tauhan sa lathalaing ito ay kathang-isip lamang, anumang pagkakatulad sa mga pangyayari ng tunay na buhay ay sadyang nagkataon lamang.

Ika-18 ng Disyembre 2009, alas sais y media ng gabi sa Pilipinas. Malamig ang simoy ng hangin, at maagang dumilim ngayong Biyernes...

Lulan ng mga magagarang sasakyan, isa-isang nagsisidatingan sa tapat ng lobby ng Manila Hotel ang mga blogerong OFW at Filipino expatriates. Suot ng mga kalalakihan ang kanilang barong-Tagalog habang kapansin-pansin naman ang mga naggagandahang kababaihan sa kanilang suot na gown. Isa-isa silang binibigyang-pugay ng mga tanod ng hotel at ginabayan patungo sa silid na pagdadausan ng pagtitipon.

Isang napakalaking palatuntunan ang magaganap sa Fiesta Pavilion. Kikilalanin at paparangalan ang mga nanalo sa 2009 Pinoy Expats/OFW Blog Awards na may temang "Pinoy Expats/OFW: Pag-asa ng Bayan, Handog sa Mundo".

Kumpleto ang lahat ng bumubuo ng PEBA, Inc., at dinaluhan ito ng mga piling panauhin mula sa dalawang pangunahing media ng bansa, at ng mga kilalang taong galing sa mga ahensiya ng pamahalaang may direktang kaugnayan sa mga Global Filipinos.

Maginaw rin sa loob ng pavilion dahil sa simoy na nanggagaling sa airconditioning unit ng hotel. Maririnig ang mga mahihinang tawanan ng mga taong nagbubulungan na sinasabayan naman ng kalansing ng mga kubyertos, subalit nangingibabaw pa rin ang kaaya-ayang tunog ng musikang jazz.

Pagkaraan ng tatlong minuto, sinimulan na ang pinakahihintay na programa...


KAPANSIN-PANSIN ANG sorpresang panauhin at mananalita. Hindi ito nagpakita sa madla hanggang siya'y ipinakilala at tinawag ng mga guro ng palatuntunang sina Bb. Reanna Marie Bautista at G. Jerald Kim Sanggalang.

Espesyal ang damit na suot ng panauhing pandangal! Siya'y nababalot ng isang mahabang Filipinianang gawa sa pinyang idinesenyo pa ni Redlan- isang kilalang blogerong mahusay sa sining. Kulay asul ang kalahati ng makintab na tela, at kulay pula naman ang nalalabing kalahati nito. Kapag natatamaan ng ilaw ang nasa bahaging dibdib ng damit, makikitang may hugis tatsulok na kulay puti na mayroong tatlong bituin at isang araw na kulay dilaw!

Nagniningning din ang isang maliit na pilak na nakasabit sa kaliwang dibdib ng magandang panauhin. Kapag sa malapitan, mapapansing ang palamuting ito ay hugis-paruparu, gawa sa napakakapal na materyales na kinulayan din ng pula, puti at saka bughaw. Napansin ni Bb. Bautista ang palamuting ito, at nasabi niyang balang araw sana'y magkaroon din siya nito.

Ngayong nasa entablado na ang espesyal na panauhin, nahahalatang medyo kulang siya sa tangkad! ...at kahit na sa malayo halatang-halata ang malaking nunal nito sa kanyang kaliwang pisngi, at ang dalawang ngipin n'ya sa harapang medyo may kalakihan.

Hindi pa niya naibuka ang kanyang bibig para simulan ang kanyang maikling pananalita ay nagpalakpakan na ang madla. [Ang 'talumpati' ng panauhing pandangal ay nominado sa Pinoy Expats/OFW Blog Awards 2009. Nandito ang kabuuan ng kanyang napakaikling pananalita- The Keynote...]